Экспазіцыю складаюць 45 абразоў ХІХ – пач. ХХ стст. з фондавай калекцыі БДМНАіП – помнікі сакральнай спадчыны беларусаў, сабраныя супрацоўнікамі музея падчас экспедыцый па вёсках Заходняга і Усходняга Палесся, часткова Падняпроўя, Панямоння.
Народныя абразы – асаблівы пласт этнічнай культуры, які ўяўляе сабой сінтэз праваслаўнага іканапісу, заходнееўрапейскага сакральнага жывапісу і прыёмаў народнага дэкаратыўнага мастацтва. Народныя абразы напісаны ў рамках агульных хрысціянскіх канонаў, але, абапіраючыся на іх, перадавалі эмоцыі, пачуцці і сімпатыі саміх іканапісцаў.
Народныя, або “хатнія” абразы, нягледзячы на адносна невысокі ўзровень мастацкага выканання, дзякуючы сваёй распаўсюджанасці і выразнай своеасаблівасці, з’яўляюцца неад’емнай часткай традыцыйнай беларускай культуры, адлюстраваннем народнага светапогляду.
